Gaa-gii-maanzhidoodawindwaa CSC

Amii igi CSC ge-naagaji'aawaad ini gaa-gii-mamaanzhiinid gaa-giba'onind niizho-aki gemaa awashime.

Giishpin giin gaa-maanzhidoodaagooyin, weweni ji-izhiseyin ninandawendaamin. Inanokiiwag imaa ji-wiindamaagooyin weweni CSC ji-dibaadodeg ezhichigemagak gaye ji-dibaajimind awe gaa-gii-maanzhidoodawig.

Inawemaaganag gaye Dazhiikewinan

Ni-nisidawinaamin egichi-inenjigaadeg inawenjigewin gaye gaa-izhi-dazhiikeng omaa Kaanada-akiing. Amii gaye ezhi-gikendaagwak awiya e-gikenimaad ini gaa-gii-maanzhidoodaagod. Gi-ga-wiindamaagoo gegoo ji-dazhimind awe gaa-gii-maanzhidoodawig aanawi inendaziwan ji-ganoonad. Gi-ga-bizindaagoo ikidoyin e-wii-ganoonaasiwad awedi.

Gi-ga-noondaagoo omaa Dibaakonigewining

Aaniin igo gi-daa-gashkitoon ji-noondaagooyin omaa izhisewining. Gi-daa-wiindamaagoog igi CSC gaa-anokiitaagewaad ji-wiindamawikwaa waa-gikendaman gaye ji-wiindamawikwaa aaniin ezhised awe gaa-gii-maanzhidoodawig.

Igi Gaa-wiiji'aawaad Gaa-gii-maanzhidoodawindwaa gi-daa-wiindamawaag aaniin enendaman. Amii dash ge-izhi-wiiji'iwemagak gidikidowin ji-inaakonigeng iwe inake.

E-odisigoyin Wiindamaagewin

Gi-daa-wiindamaagoo ezhichiged awe gaa-gii-maanzhidoodawig giishpin gagwejimadwaa igi CSC gemaa PSC. Amii ge-izhi-gikendaman aaniin ezhiseg iwe gaa-onji-bagidinindwaa gaa-gii-mamaanzhiiwaad. Amii ge-onji-wiiji'igoyin ji-gotaajisiwan gaye ji-ani-na'endaman. Bizaanigo gaye awiya bakaan gi-daa-gagwedwetamawaa gemaa awiya bakaan gi-daa-gagwedwetamaag.

Awenen Ge-odisigopan Wiindamaagewin?

Gaa-mamaanzhiiwaad Bagidiniwe Inaakonigewining ikidoomagan awenen ge-wiindamawaaganiwipan aan ezhisewaad igi gaa-gii-mamaanzhiiwaad gaa-giba'ondwaa niizho-aki gemaa awashime.

  • awiya gaa-gii-maanzhidoodawind gaa-gii-izhi-maanzhised idash owiiyawing gemaa odinendamowining.
  • wiidigemaagan, inawemaagan, gaa-gii-bami'igod ini gaa-gii-maanzhidoodaagod gemaa awiya gaa-gii-bami'aad ini gaa-nibonid gemaa ini gaa-gashkitoosiinid ji-bami'idizonid (awiya gaa-aakozid gemaa abinoojii), gemaa awiya gaa-bami'aad awiyan gaa-bami'aad awe gaa-gii-maanzhidoodawind, gemaa
  • awiya gaa-mamizhimiwed, dakoniwewininiwa gemaa gaa-dibaakoniwenid gaa-wiindamawaad.

Wegonen Wiindamaagewin ji-dibaajimind Omamaanzhii ge-miinigoo'amban?

Apii gagwejimigooyaang, owe gi-daa-wiindamaagoom:

  • ezhinikaazod awe omamaanzhii.
  • gaa-gii-izhi-mamaanzhiid gaye gaa-gii-dazhi-dibaakonind awe omamaanzhii.
  • apii gaa-gii-maajii-giba'ond awe omamaanzhii gaye aaniin minik imaa ge-giba'ond.
  • apii ge-gashkitoopan ji-zaaga'ang ajina awe omamaanzhii gaye ginwesh ji-zaaga'angiban.

Owe gaye geyaabi gi-daa-wiindamaagoo:

  • aaniin endasobibooned awe omamaanzhii.
  • giishpin megwaa e-giba'ond awe omamaanzhii giishpin dash gaawiin, aan wenji-gibawaasiwind;
  • aaniin ezhinikaadeg aaniindi gaye eyaamagak iwe gaa-dazhi-giba'ond awe omamaanzhii.
  • giishpin gaa-aanji-asind awe omamaanzhii.
  • aaniin ezhitamawind awe omamaanzhii megwaa imaa e-giba'ond;
  • aaniin geyaabi gaa-izhi-mamaanzhiid awe omamaanzhii megwaa e-giba'ond;
  • apii ge-bagidinind omamaanzhii ajina gemaa ji-anokiid gemaa ji-bagidinind ajina gemaa nepij.
  • apii ge-bizindawaaganiwid awe omamaanzhii ji-bagidinaaganiwigwen ji-zaaga'ang.
  • wegonen wenji-baginind ajina ji-zaaga'ang.
  • wegonen ge-inind ji-izhichigesig giishpin ajina zaaga'ang awe omamaanzhii, gemaa wii-anokiid ajina.
  • aaniindi ge-izhaad awe omamaanzhii giishpin ajina bagidinind ningoji ji-izhaad, gaye giishpin jiigiya'ii ji-ayaagwen awe gaa-gii-maanzhidoodawind megwaa zaaga'ang awe omamaanzhii.
  • aaniin apii ge-bizindaagod PBC awe omamaanzhii.

JI-miigiweng Wiindamaagewin

Giishpin inendaman gi-daa-wiindamaage aaniin gaa-izhi-maanzhidoodaagoyin gaye gidinawemaaganag gaa-giidoodawig awe omamaanzhii, gemaa ji-wiindamaageyin gegoo gaa-gikendaman awe omamaanzhii onji. O-da-wiiji'igonaawaa dash igi

Ganoonadwaa CSC Gaa-gii-maanzhidoodawindwaa ji-wiindamaagooyin, gaawiin da-wiindamwaaganiwisii omamaanzhii e-gii-bi-giigidoyin. Giishpin dash wiin miigiweyin dibaajimoyin ge-bagamishkaagod awe omamaanzhii, boochigo da-wiindamawaa, gaawiin dash wiin ezhidaayin gaye gigiigidowin agindaason.

Aaniindi Ge-izhi-giigidoyin/ozhibii'igeyin

Gi-daa-ganoonaag CSC ji-gikendaman ezhi-mino-wiiji'indwaa gaa-gii-maanzhidoodawindwaa awiyag.

Memwaach ji-diba'igesiwan: 1-866-806-2275
Ii-bii'igewin: victims-victimes@csc-scc.gs.ca
Asab: www.csc-scc.gc.ca/victims/

Godag Wiiji'iwewinan
Bagidiniwewin Kaanada - Gaa-gii-maanzhidoodawindwaa Ji-wiiji'indwaa
Memwaach ji-diba'igesiwan: 1-866-789-4636 Asab: www.pbc.clcc.gc.ca

Dibaakonigewin - Ji-wiiji'indwaa Gaa-gii-maanzhidoodawindwaa.
Zhooniyaa ji-onji-izhaang PB bizindaagewinan.
Memwaach ji-diba'igesiwan: 1-866-544-1007
Asab: www.justice.gc.ca

Ozhibii'igewigamig Ge-izhi-wiiji'indwaa gaa-gii-maanzhidoodawindwaa
Memwaach ji-diba'igesiwan: 1-866-481-8429
Asab: www.victimsfirst.gc.ca